Påske i Jotunheimen

Kva med å byte ut lange heiskøar og trengsel i langrennssporet med boltreplass blant landets høgaste fjell, utsøkt lokalmat og hyttehygge?

Påska i Lom og Jotunheimen oppfyller alle påskedraumar. Ved sidan av sol i fjeset, fyr på peisen og god stemning i hytteveggen, innbyr det viltre høgfjellsterrenget til snø- og skileik for både store og små. Her kan du vandre opp i høgden og speide utover tinderekkene, gå frå hytte- til hytte på fjellski, kruse over kvitlagte isbrear eller rett og slett baske og leke deg i snøen. 

Lom – fjellbygda mellom aust og vest

Midt i kremen av fjellheimen ligg nasjonalparklandsbyen Lom som eit knutepunkt mellom aust og vest. Det sjarmerande bygdesentrumet er ei perfekt «feriebase», med gangavstand til bakeri, butikkar og serveringsstedar, fleire godt merka lokale vandreturar – og stutt veg til fjells! 

Nasjonalparken midt i Norge er nemleg smykka med dei høgaste fjella i Nord-Europa, med Galdhøpiggen og Glittertinden som dei to høgaste. Faktisk ligg dei aller fleste av landets drøye 300 toppar over 2000-meter i Lom kommune. Dei mange isbreane bidreg til å forlenge vårskisesongen.  

Høgfjellspåske på trivelege turisthytter  

Strategisk plassert mellom fjelltoppane; finner du et rikt utval av overnattings- og serveringsstader som har lang tradisjon i å ta vare på kresne og eventyrlystne fjellturistar. 

– I Jotunheimen kan du faktisk bu på den same fjellhytta heile påska, og likevel gå nye dagsturar kvar eineste dag. Moglegheita for «ski rett frå døra» og tilgang til eit vell av nærliggande 2000-meterstoppar er ein av Jotunheimens særeigenheiter. 

Kulturen og den lokale stuttreiste maten har stort fokus i området, så her er det moglegheiter for smakfulle opplevingar både før og etter skituren. Om du ikkje er kjend, eller ynskjer å finne den beste snøen eller råaste utsikta, tek fjellvante skiguidar deg gjerne med på tur – med fokus på sikkerheit og meistring. Og manglar du utstyr, kan du leige både ski, skredpakke og anna turutstyr i området. 

Både bortover – og nedoverski  

Sjølv om Jotunheimen er eit ynda topptureldorado, er det tett mellom kvista løyper og dermed ideelt å velgje fjellski. Ynskjer du å lange ut i velpreparerte langrennsløyper, blir det køyrt opp kilometervis med langrennsløyper på høgfjellsplatåene Sognefjellet og Valdresflye. For barnefamiliar er dessutan fjellstovene ei ypparleg base for stuttreiste og varierte uteaktivitetar heile påska. 

Om du drøymer om ein ekstra lang skitur i år, er det kanskje sesongen for å teste ut Høgruta i Jotunheimen Høgruta i
Jotunheimen - ein 5-dagers skitur mellom 2000-meterstoppar, brear og betjente turisthytter i Jotunheimen. Ruta har raskt vorte ein klassikar som hamnar høgt på prioriteringslista til toppturfolket.

Om du ynskjer ein "snillare" variant av Høgruta, kan du gå "lågruta" på fjellski. Da følgjer du kvista løyper mellom dei betjente fjellstovene.

Og, det er lov å bli sittjande i solveggen og berre nyte fjellro og utsikt. 
Velkomen til fjellpåske i majestetiske Jotunheimen