Topptur på ski: Svellnosbreahesten (2181 m.o.h.)

Om

Svellnosbreahesten (2181 moh) - er ein lett tilgjengeleg topp som ligg heilt for seg sjølv midt på Svellnosbrean. 

Beste utgangspunkt: Spiterstulen turisthytte
Høgdeforskjell: Ca. 1000 høgdemeter
Antatt tidsbruk: 4- 5  timar tur- retur.
Utstyr: Normalt toppturutstyr
Anbefalt skiutstyr: Fjelltelemark, randonnée, snowboard og fjellski.

Bak Galdhøpiggmassivet ligg ei skjult perle av ein skitur. Svellnosbreahesten (2182 moh) er, som namnet tilseier, ein nunatak eller ein brehest, altså eit fjell som stikk opp av, og er omkransa av ein isbre. Svellnosbreahesten er i seg sjølv ikkje eit majestetisk fjell, men med utsikt til Galdhøpiggen, Tverråtindandane, Ymels- og Storjuvtind samt Skarstind er brehesten omkransa av eit storreist selskap av majestetiske toppar. 

Skituren startar frå turisthytta Spiterstulen i Visdalen, 1100 meter over havet. Følg fyrst elva Visa ein drøy kilometer før du dreiar inn i Tverrådalen og opp mot Svellnosbrean. Her kan du anten gå opp moreneryggen med skia på sekken eller fortsette på ski opp flanken vest for ryggen. Frå brekanten bratnar det til opp mot Solskinnstoppen (35 grader) som ein passerar på vestsida, altså til venstre for Solskinnstoppen. Her kjem ein inn på Svellnsobrean som ein følger mellom Svellnosbreahesten og Tverråtinden til topps. Om du vil gå oppom Tverråtiden på turen, kan dette lett kombinerast på same tur. 

Spesielt ved tynt snødekke må ein vere merksam på at det partivis er store sprekkområder på denne delen av breen. Toppunktet når ein enkelt til fots og skikøyringa heim byr på nydeleg crusing over breen før det blir litt brattare ned att i Tverrådalen. Retur same veg som opp.
 

Kilde: www.galdhopiggen.no / Spiterstulen bre- og fjellføring