Topptur på ski: Høgdebrotet (2226 m.o.h.)

Om

Høgdebrotet (2226 moh.) er eit populært toppturmål frå Valdresflye, aust i Gjendealpane i Jotunheimen.

Beste utgangspunkt: Fv. 51, Valdresflye
Høgdeforskjell: Ca. 1300 høgdemeter (ca. 8 km. i lengde)
Antatt tidsbruk: 6-7 timar (tur-retur). Totalt 17 km.
Utstyr: Fjelltelemark, randonnée og fjellski.
Vegval: Lang tur med jamn stigning
Ver obs på: Overhengande skavlar over stup i nord

Høgdebrotet er ein lett tilgjengeleg 2000-meterstopp og ein populær topptur på ski, særleg etter at Valdresflye har opna opp att etter vinterstenging (vanlegvis kring 1.april). Det er dessutan ein trygg topptur da det er mogleg å følgje søraustryggen opp mot toppen utan å gå inn i skredterreng (over 30 grader bratt). 

Ryggen opp er lang, men ein blir belønna med majestetisk utsikt inn i dei innarste delane av Jotunheimen - og lang og fin nedkøyring.

Enklaste utgangspunktet er frå Valdresflyvegen ved kommunegrensa mellom Vågå og Øystre Slidre. Da ventar det deg 8 km.og 1300 høgdemeter opp til toppen. Fyrste del av turen går over Leirungsmyren kor ein ser innover Leirungdalen og mot andre populære toppar frå Valdresflye, som Rasletinden, Munken og Mugna. Gå over dalen der Leirungsåa renn i botnen og opp Steinflya, ein dryg motbakke før terrenget flatar ut litt og fører fram til toppryggen. Her ventar ei god kneik som fører opp til toppunktet, som er nokså flatt. Frå toppen ser en inn i et svært flott brelandskap med Vestre- og Austre Memurubrean omkransa av kvasse og alpine tindar på alle kantar.

Heimturen går av seg sjøl, og det ventar ei lang og fin nedkøyring. På varme vårturar kan føret bryte i dalen og elva kan vera ei utfordring.

Vil du vidare? Mange vel å fortsetje turen vidare til Steinflytinden (2318 moh.), som er nærmaste nabo til Høgdebrotet. Ofte er snøforholda slike at du kan gå vidare frå denne og opp. Med same utgangspunkt frå bilvegen går turen til Steinflytinden også opp Steinflya som flatar ut før ein bratt rygg fører opp til toppen. Frå her kan du òg følgje ryggen vidare til Tjønnholstinden. 

Les meir her: Rundtur Høgdebrotet - Steinflytinden - Tjønnholstinden 

Leirungsdalen har mange spanande turar å by på, og er best tilgjengeleg på seinvinter og vår. Her er det til dels lang adkomst til turmåla. Ein del av toppane her er alpine og krev høg mestring, andre er lette å gå på for ivrige skigåarar. Det er alltid viktig å vurdere rasfaren. Om våren har snøen gjerne sett seg, så risikoen er mindre. Men tenk alltid på rasfaren og pass deg for hengande skavlar.