Topptur på ski: Veslbreatinden (2092 m.o.h.)

Om

TOPPTUR TIL VESLBREATINDEN (2092 m.o.h.) - ein lettgått og tilgjengeleg topptur frå Leirdalen eller Sognefjellet, som gjev skikøyring i særklasse over snøsikker bre. 

Beste utgangspunkt: Geitsetre i Leirdalen eller Krossbu (Sognefjellsvegen)
Høgdeforskjell: Ca. 1100 meter
Tid:  5–7 timer, hvorav ca. ½ time retur
Ver obs på: Skredfare frå Storbreahøes nordvegg. Store bresprekker oppunder Veslbreatindens nordside.
Utstyr: Normalt toppturutstyr og skarejern. Breutstyr må vurderes
Anbefalt skiutstyr: Fjelltelemark, randonnée, snowboard og fjellski.

Turen til Veslbreatinden kan starte frå fleire kantar, og gjerne kominerast med fleire kringliggande 2000-meterstoppar. 

1) Start frå Leirdalen, kryss elva Leira på ein sikker stad og følg det bølga terrenget oppover mot Veslbrean mellom Skagsnebb og Storbreahøe. Er det ingen sikre snøfelt å finne, er elva flat og normalt grei å krysse/vasse ca. 1,5–2 km ovanfor Geitsetre. Alternativet er å gå over Geitbrua, og følgje elvas vestside oppover.

Sikt deg inn på breen, og hald litt til høgre for å ha god avstand til den skredutsette nordveggen på Storbreahøe. Her går det ofte store skred som sklir eit stykke utover i det slake terrenget under. Følg deretter breen oppover, og hald til høgre når breen etter kvart bratnar til før toppen. Rund til venstre mot toppen og følg det slake terrenget til topps.

Enkelte vel å avslutte turen på Hurrbreatinden, noko som òg er eit bra alternativ sjøl om det gir ca. 30 høgdemeter mindre nedkøyring. Det er ofte flott og leiken skikøyring i det bølga terrenget ned mot Leira. Alternativet er å køyre nærmare Skagsnebb si austside, og på den måten oppnå noko brattare skikøyring attende til Geitsetre.

2) Start frå Krossbu (Sognefjellet): 
Frå Krossbu kryssar du elva Bøvre over brua. Gå opp på venstre side av elva Leira. Dette er spesielt viktig seint på sesongen - da det kan vere krevjande å krysse elva lenger opp. På ca 1500 meter skrår du opp til venstre for bekken som renn ned frå det vesle vatnet ved punkt 1732 m. på kartet. Det er jamn helling heile vegen opp, men eit litt brattare parti mellom mellom 1600 -1700 meter over havet. 

På same tur kan du gå oppom Hurrbreatind (2060 m) som ligg like nord for Veslbreatinden. Toppen bestiger du enkelt frå sør via bandet mellom dei to toppane. For vidarekomne som ynskjer lengre og litt brattare nedkøyring, er det fint å køyre ned Hurrbrean til Leirdalen. Denne nedkjøringa byr på rundt 400 høgdemeter ekstra, men merk deg at du da ikkje kjem ned att til bilen din, men havnar lenger ned i dalen. 

Fleire toppar på turen?
I dette området er det mogleg å bestige fleire 2000­-meterstoppar på same turen. Kombiner gjerne Storebreatind 2018 moh, Veslbreatind 2092 moh, Hurrbreatind 2064moh., Veslfjelltind 2157 moh. og eventuelt Loftet 2170 moh.

VIKTIG INFORMASJON
Kryssing av elv: Om våren vert elva Leira kryssa av mange, ofte på små område der det ligg att snø. Snøsituasjonen nede i dalen varierar frå år til år, og det er difor uvisst kor lenge dette er forsvarleg. Det er viktig å gjere grundige vurderingar før du kryssar eit snøfelt over elva. Er du i tvil, vil ein omveg vere beste alternativ.

Parkering: Skagsnebb, Bakarste Skagsnebb, Veslbreatinden, Storbreahøe og Veslfjelltinden er turar som startar ved Geitsetre, og kryssing over Geitbrua. Geitsetre ligg ca. 5 km inn i Leirdalen etter avkøyring frå Fv.55. Det er normalt greit å parkere på vegskuldra og naturlege «lommar» i terrenget.

Meir info? Alle turbeskrivingar frå Leirdalen er skreve av Per-Arne Andersen, og er henta frå boka «På tur – Leirvassbu». Kart med inntegna ruter kan kjøpast på Leirvassbu.