Glitterheim | Restaurant

Om

På Glitterheim får du tradisjonsrik fjellkost, laga på gamle oppskrifter og lokale råvarer. Du er garantert mat av høg kvalitet, med historia til råvarene servert attåt.

Det er viktig for oss å nytte råvarene vi har i fjellet og vi lagar så mykje som mogleg av maten sjølve. All spekemat er laga i Glitterheim, av elg, hjort, rein, rådyr, sau, gris og hest. Vi røyker og speker hestekjøt, og varm- og kaldrøyker fisk med einer. Sylting og graving er også noko vi gjer frå tid til anna. Vekstar som rabarbra og kvann nyttar vi i dessertar, syltetøy, chutney med meir.

Vi tek i mot slakt, og nytter gamle oppskrifter for å lage tradisjonsrike pålegg som til dømes reinsdyrleverpostei. Nybaka brød og varme bollar er sjølvskrivne til alle frukostar på Glitterheim.

På dagtid har vi dagens sandwich og dagens suppe på menyen frå kl. 13.00 - 17.00.

Middag serverast kl. 18.30 og 19.30 (med unntak av onsdag og laurdag då det er koldtbord).
Fredagar er det mår (hjortehakk) til hovudrett, og på sundag har vi fisk. Om fiskelykka er god er det fisk frå Steinbuvatnet.

Maten vert serverert fram til kl. 21.00 og ingen gjester skal gå svoltne til sengs!

Koldtbord

På onsdagar og laurdagar er det koldtbord på Glitterheim kl. 18.30 og 20.00 – noko som etter kvart har vorte populært for tilreisande gjester óg. Det tykjer vi er stas!

Onsdag er det reinsdyrtunger, varmrøykt og sylta aure og kjøttsuppe kokt på reinsdyrkraft som står på menyen. Vi avslutter med rullekake til dessert.

Laurdag er det rumgraut med spekemat attåt – heimlågå så klart!

Sesong
​​​​​​Medio mars - medio april og medio juni - medio september
 

Velkomen!